Fylkir vill vera félag þar sem gleði, virðing og metnaður einkenna allt starf. Til þess þurfum við reglulega að hlusta á þá sem þekkja starfsemi félagsins best – iðkendur og foreldra þeirra.

Aðalstjórn Fylkis hefur því ákveðið að framkvæma þjónustukannanir í öllum deildum félagsins. Markmið verkefnisins er að fá skýra mynd af því hvað gengur vel, hvað má bæta og hvernig við getum skapað enn betri upplifun fyrir iðkendur og fjölskyldur þeirra.

Taktu þátt í könnun um félagið: https://form.typeform.com/to/fhFeH1Sn

Kannanirnar eru ekki aðeins tæki til að mæla ánægju heldur einnig mikilvægt umbótatól. Niðurstöðurnar munu hjálpa stjórnum, þjálfurum og starfsfólki að forgangsraða verkefnum, styrkja það sem vel er gert og bregðast markvisst við þeim þáttum sem þarf að þróa frekar.

Með verkefninu vill Fylkir:

• Hlusta markvisst á iðkendur og foreldra.

• Stuðla að stöðugum umbótum í starfi allra deilda.

• Mæla árangur og fylgjast með þróun milli ára.

• Byggja upp sameiginlegan gæðamælikvarða fyrir félagið.

• Styrkja stöðu Fylkis sem eftirsóknarverðs íþróttafélags fyrir börn, ungmenni og fjölskyldur.

Þjónustukannanirnar eru framkvæmdar með reglubundnum hætti þannig að hægt sé að fylgjast með framförum yfir tíma og sjá hvort aðgerðir skili tilætluðum árangri. Með því sýnir Fylkir í verki að félagið hlustar, lærir og leitast stöðugt við að verða betra.

Fylkir mælir ekki árangur eingöngu í stigum, mörkum og verðlaunum – heldur einnig í upplifun, ánægju og trausti þeirra sem mynda félagið. Við teljum að góð íþróttastarfsemi byggist á samstarfi iðkenda, foreldra, þjálfara, sjálfboðaliða og stjórnenda. Þjónustukönnunin er mikilvægur hluti af því samtali.

Frá vinstri: Björn Gíslason formaður Fylkis, Heiða Björg Hilmisdóttir borgarstjóri Reykjavíkur, Pétur Freyr Pétursson framkvæmdastjóri Íþöku fasteigna & Pétur Guðmundsson

Reykjavíkurborg og Íþaka fasteignafélag skrifuðu í dag undir nýjan samning um Fylkisselið í Norðlingaholti. Fylkisselið hýsir í dag aðstöðu fimleikadeildar, karatedeildar og rafíþróttadeildar Fylkis.

Samningurinn kveður meðal annars á um stækkun hússins, sem mun bæta aðstöðu iðkenda, þjálfara og starfsfólks til muna. Þá verður aðstaða fyrir áhorfendur einnig verulega bætt, en hún er í dag takmörkuð.

Um er að ræða mikil gleðitíðindi fyrir starfsemina í Fylkisselinu. Auk fyrrnefndra íþróttadeilda fer þar fram starf Betri Borgara Fylkis, þar sem yfir 200 manns á besta aldri koma saman þrisvar í viku til líkamsræktar.

Framkvæmdir við stækkunina hefjast í sumar og er áætlað að þeim ljúki í lok árs 2027.