Harpa Karen framlengir samning sinn við Fylki!

Knattspyrnudeild Fylkis tilkynnir með mikilli gleði að Harpa Karen Antonsdóttir hefur framlengt samning sinn við Fylki út keppnistímabilið 2026. Við væntum þess að hún eigi eftir að leggja mikið af mörkum til liðsins á komandi tímabili að vinna til baka sæti okkar í Lengjudeildinni.

Harpa Karen er uppalin hjá Val en kom til félagsins fyrir síðasta tímabil. Hún hefur leikið 120 KSÍ leiki í meistaraflokki og skorað í þeim 12 mörk.
Við bindum miklar vonir við Hörpu Karen á komandi keppnistímabili og hlökkum til að sjá hana áfram spila í appelsínugulu.

Herrakvöld Fylkis hefur verið fastur liður í félagssstarfi Fylkismanna áratugum saman. Markmiðið með Herrakvöldum Fylkis er að Fylkismenn, vinir og velunnarar komi saman og geri sér glaðan dag, borði góðan mat og skemmti sér saman. Auk alls þessa eru Herrakvöld Fylkis afar mikilvæg í fjáröflun Knattspyrnudeildar Fylkis.

Hér má finn yfirlit yfir öll málverk sem verða gefin upp á kvöldinu og upplýsingar um listamenn á bakvið verkin.

---

Hrafnhildur Inga Sigurðardóttir fæddist árið 1946 að Vestur-Sámsstöðum í Fljótshlíð og ólst þar upp. Hún hefur lengst af búið á Reykjavíkursvæðinu en hefur snúið á heimaslóðir á ný og býr nú jöfnum höndum í Garðabæ og á Sámsstaðabakka í Fljótshlíð við bakka Þverár. Hún stundaði myndlistarnám við Myndlistarskóla Reykjavíkur 1978 og 1979, Myndlista- og handíðaskóla Íslands nú Listaháskóla Íslands, 1980-1984 og lauk þaðan prófi í grafískri hönnun. Árin 1999-2000 bætti hún við sig námi í olíumálun í Myndlistarskóla Kópavogs.

Hrafnhildur Inga málar myndir sem lýsa skýjafari, veðurfari og sjólagi. Hún er mikið náttúrubarn og sækir myndefnið oft á sínar heimaslóðir í Fljótshlíðinni þar sem hún horfir eftir endilangri suðurströndinni þar sem skýin hrannast upp og velta sér eftir sjóndeildarhringnum og eru aldrei andartak eins.

---

Steinunn Þórarinsdóttir myndhöggvari sem nam og starfaði á Englandi og á Ítalíu er listakona sem hefur hlotnast fjöldi viðurkenninga fyrir list sína hérlendis sem og erlendis á ferli sem spannar nú yfir 45 ár. Steinunn hefur haldið fjölmargar sýningar víðsvegar um Evrópu, í Japan, Ástralíu, Bandaríkjunum og Kanada og verk hennar er að finna um allan heim, jafnt á virtum söfnum sem og í einkaeigu. Nýverið kom út bókin Maður sem inniheldur myndir af öllum helstu verkum Steinunnar, auk þess sem bæði innlendir og erlendir sérfræðingar fjalla um listferil hennar og verk frá fjölbreyttum sjónarhornum.

Það er okkur sérstök ánægja að kynna að listaverk eftir Steinunni verður boðið upp á Herrakvöldi Fylkis þann 16. janúar nk.

---

Þorvaldur Jónsson útskrifaðist frá Myndlistardeild Listaháskóla Íslands árið 2009 og hefur síðan þá tekið þátt í fjölda sýninga, bæði hérlendis og utan landsteinanna, til dæmis í Þýskalandi, Kína og Tyrklandi. Verk hans hafa meðal annars verið sýnd í Listasafni Reykjavíkur, Gerðarsafni í Kópavogi, Hafnarborg, Listasafni Akureyrar og Safnasafninu á Svalbarðsströnd. Þorvaldur er einn af stofnendum Gallery Ports á Laugavegi.Verk Þorvaldar eru einskonar sögusvið þar sem ýmsar atburðarrásir eiga sér stað.

Það er ánægjulegt að kynna að mynd eftir Þorvald verður boðin upp á Herrakvöldi Fylkis þann 16. janúar nk. Í verkinu má m.a. finna tilvísun í merki Fylkis, herrakvöldið og knattspyrnu.

---

Sossa hefur í mörg ár lagt Fylki lið með verkum á Herrakvöldinu og notið mikilla vinsælda. Hún lærði myndlist í Myndlistar- og handíðaskóla Íslands, fór í framhaldsnám í Konunglegu dönsku listaakademíunni í Kaupmannahöfn og lauk svo meistaragráðu við listaháskóla í Boston árið 1993. Hún hefur haldið sýningar víða um heim s.s. á Alþjóðlega tvíæringnum í Peking í Kína, Koppelman Gallery í Massachusetts, Galleri Sct. Gertrud í Kaupmannahöfn, Mac Gowan Fine Art í Bandaríkjunum, Aalborg Art Association í Danmörku, Galeria de Arte í Portúgal, við listasafn Norrænu ráðherranefndinar, Tvíæringnum í Flórens, Art Apart í Singapore og í Gallerí Fold í Reykjavík. Sossa hefur hlotið ýmsar viðurkenningar fyrir list sína í gegnum árin.

---

Húbert Nói Jóhannesson útskrifaðist úr Nýlistadeild Myndlista- og Handíðaskóla Íslands árið 1987. Á námsárum sínum hóf Húbert Nói að notast eingöngu við minni til að kortleggja innri veruleika í tilvist með ytri veruleika og minnið, verandi persónulegasta nálgun sem listamaður hefur aðgang að, er einskonar kjarni höfundarverks Húberts.
Á undan námi í myndlist nam Húbert líffræði og jarðfræði við Háskóla Íslands og samfara því vann hann við jarðfræðirannsóknir á hálendi Íslands. Sú upplifun í áhrifaríku þöglu umhverfi hálendisins sem Húbert skannaði með mælitækjum nútímans má sjá síðar í verkum Húberts Nóa.
GPS verkin koma til sögunnar snemma árs 1996. Í þessum verkum er meðvitað verið að nota rómantískta upplifun manneskju í sama mund og skráð er staðsetning með aðstoð gervitungla og atóm-klukku tímamaælinga, hátækni geimaldar.

Þessi verk ávarpa þannig djúpar tilfinningar og vitsmuni á sama tíma, Þan tilfinninga og vitsmuna manneskju í tengslum við aukna náttúru og umhverfisvitund. Þegar ég íhuga verkin við gerð þeirra hugsa ég til gervitungla á sporbaug jarðar ekki síður en það sem fyrir augu ber í kyrru landslagi.“
Verk Húberts Nóa eru í eigu allra helstu opinberra safna á Íslandi auk einkasafna hérlendis, í Bandaríkjunum, Bretlandi, Frakklandi, Danmörku, Hollandi og Þýskalandi.
Þess má geta að Húbert Nói sem er uppalinn í Árbænum æfði handbolta og fótbolta með Fylki. Húbert var í 5. flokks liði Fylkis í fótbolta sem vann til fyrstu verðlauna félagsins í fótbolta þegar liðið sigraði Reykjavíkur mótið árið 1973.

---

Pétur Gautur hefur um árabil lagt Fylki lið með verkum á Herrakvöldinu og notið mikilla vinsælda. Hann útskrifaðist frá Myndlista- og handíðaskólanum árið 1991 og nam m.a. leikmyndagerð í gamla konunglega leiklistarskólanum Statens Teaterskole í Kaupmannahöfn í Danmörku. Pétur Gautur hefur verið atkvæðamikill kyrralífsmálari í yfir þrjátíu ár og verk hans eru landsmönnum vel kunn, en hann er helst þekktur fyrir uppstillingar sínar þar sem jafnan koma við sögu ávextir eða blóm. Hann hefur unnið af krafti að list sinni í yfir þrjátíu ár bæði á Íslandi og í Danmörku og hefur haldið á þriðja tug einkasýninga hérlendis og í Danmörku og Svíþjóð.

Uppstillingar eru klassískt mótíf í listasögunni sem Pétur Gautur hefur kannað og leikið sér að í gegnum ferilinn og er hann vel þekktur fyrir þessar tímalausu kyrralífsmyndir sínar og ferskt litaval. Hann trúir á einfaldleikann og notar oft óhefðbundna, en vel valda liti í myndir sínar.

---

Kristín Gunnlaugsdóttir er fædd 1963 og nam myndlist í Myndlistarskólanum á Akureyri og Myndlista- og handíðaskóla Íslands á árunum 1983-88. Þá fór hún utan og lagði stund á íkonamálun í Fransescane Missionarie di María klaustrinu í Róm og þá tók við listnám við Ríkisakademíuna í Flórens á Ítalíu árin 1987-93. Kristín er einn afkastamesti og ástsælasti listamaður samtímans sem á að baki fjölmargar viðamiklar sýningar og verk víða í opinberri eigu.

Kristín hefur vakið athygli fyrir að vera óhrædd við að brjóta upp myndmál sitt og aðferðir. Hún sækir í aldagamlar hefðir íkonamálunar og skapar fígúratíf málverk sem byggjast á margslungnu táknkerfi. Þá vinnur hún abstraktverk. sem kallast á við tjáningarmáta módernismans, sem og vandlega útfærð útsaumsverk sem byggja á skjótunnum skissum – svo nokkur dæmi séu tekin. Í gegnum myndir hennar má skynja hvernig hún nálgaðist viðfangsefnið með virðingu, forvitni og næmni fyrir því hvernig líkaminn og myndmálið geta tjáð það sem ekki verður sagt með orðum. Sérvaldar vísbendingar fylgja með, stelling, hlutur, litur eða áferð, sem styðja áhorfendur í að nema hið ósagða.

Um þessar mundir er yfirlitssýning með verkum hennar hjá Listasafni Íslands á Kjarvalsstöðum og hefur sýningin notið mikilla vinsælda enda gefur hún gott yfirlit yfir verk og feril Kristínar.

---

Hjalti Parelius sem bjó í Árbænum á yngri árum er fæddur árið 1979 í Reykjavík og stundaði listnám í Fjölbrautaskólanum í Breiðholti og síðan við Danska hönnunarskólann í Kaupmannahöfn með áherslu á grafíska hönnun. Hjalti hefur vakið mikla athygli fyrir verk sín og er hvað þekktastur fyrir olíumálverk þar sem teiknimyndamótíf eru í forgrunni.

Hjalti hefur haldið á annan tug einkasýninga hér á landi auk þess að taka þátt í fjölda samsýninga. Því til viðbótar hefur Hjalti tekið þátt í samsýningum í Danmörku, Sviss og Þýskalandi.

Verk Hjalta hafa selst víða og sem dæmi má nefna að í höfuðstöðvum lyfjafyrirtækisins Alvotech er að finna verk eftir Hjalta sem eru mjög umfangsmikil en Hjalti vann að þeim verkum í 18 mánuði samfellt á sínum tíma.

---

Karen Ösp Pálsdóttir (f. 1992, Reykjavík) er íslenskur málari sem vinnur aðallega með olíu á striga. Listsköpun hennar byggir á raunsæi, en sveigir oft inn á súrrealísk og draumkennd svið. Blár litur ræður ríkjum í litasamsetningu hennar – ekki aðeins sem litur, heldur sem andrúmsloft þar sem viðfangsefnin birtast, leysast upp eða sundrast. Andlit endurspeglast í vatnsdropum, aflagast í gegnum gler eða leynast á bak við fíngerð mynstur, sem veitir portrettum hennar dulúð, trega og umbreytingu.
Hún lauk BFA-prófi frá Maryland Institute College of Art (MICA) í Baltimore árið 2013, með aukagrein í listasögu, og hefur á undanförnum árum búið og starfað til skiptis í New York borg og Reykjavík. Verk hennar hafa verið sýnd á alþjóðlegum vettvangi, með einka- og dúó sýningum í Reykjavík, auk fjölmargra samsýninga í borgum á borð við New York, Washington DC, London, París, Barcelona og Annecy.

Málverk Karenar hafa jafnframt birst í virtum útgáfum á borð við New American Paintings, Create! Magazine, SFMOMA, Hyperallergic, Tibia Magazine og El País.
Það er Knattspyrnudeild Fylkis mikið ánægjuefni að kynna verk Karenar Aspar til leiks í fyrsta sinn á Herrakvöldi í samstarfi við listamanninn sjálfan og Þulu Listgallerí.

Um málverkið sem boðið verður upp á Herrakvöldi Fylkis nk föstudag:
Hair (bow) eða Hár (slaufa) er fyrsta sjálfsmynd listamannsins sem hefur aðallega fengist við að túlka fólk í sínu nærsamfélagi. Í stað þess að mæta áhorfanda auglitis til auglitis sjáum við aftan á hana sem býður upp á túlkun þess sem á það horfir og viðfangsefni myndarinnar, slaufa í hári marglaga táknmynd sem talar bæði inn í samtímann sem og horfna tíma. Málverkið er eingöngu málað með kóbalt bláum lit sem einkennir pallettu Karenar Aspar og þó svo það sé ofur raunsætt leyfir hún þó olíunni og pensilstorkunum að finna fyrir sér þegar nær er komið verkinu.

---

Þorlákur Kristinsson Morthens (f. 1953), betur þekktur sem Tolli er þekktur fyrir landslags og abstrakt verk sín síðan á 9. áratugnum. Tolli hefur í gegnum tíðina selt fleiri myndir en nokkur annar íslenskur myndlistarmaður og eru verk eftir hann m.a. í eigu Listasafns Íslands, Listasafns Reykjavíkur og listasafns Háskóla Íslands, auk nokkurra stofnana í Evrópu og Bandaríkjunum.
Tolli er fæddur og uppalinn í Reykjavík. Hann hóf nám við Myndlista- og handíðaskóla Íslands árið 1978 og lauk þar prófi úr nýlistadeild árið 1983. Eftir það fór hann í Hochschule der Künste í Vestur-Berlín undir handleiðslu Karl-Horst Hödicke prófessors og sneri heim1985 og hefur starfað sem myndlistarmaður síðan. Fram að því hafði hann stundað sjómennsku við Íslandsstrendur, jafnt á fiskibátum og togurum. Hann var einnig farandverkamaður í ýmsum sjávarplássum víða um Ísland og skógarhöggsmaður í Norður-Noregi.

Fyrstu sýningar Tolla voru í Reykjavík og á Akureyri árið 1982 og fyrsta einkasýning hans var síðan í Gúmmívinnustofunni í Reykjavík árið 1984. Árin 1982 – 1992 sýndi hann tuttugu og tvær einkasýningar hér á landi og erlendis, og tók þátt í sautján samsýningum sem þykir mjög mikið. Þá hefur hann efnt til sýninga í Þýskalandi, Danmörku, Mónakó, Bretlandi, Bandaríkjunum og Suður-Kóreu.

Tolli sérhæfir sig í landslagsmálverkum og reynir að nálgast það á mismunandi vegu. Hann fær innblástur úr náttúrunni og hvað er að gerast í heiminum hverju sinni. Hann gengur mikið á fjöll og jökla, fer á kajak og heimsækir afskekkta staði til að styrkja tengslin enn frekar við náttúruna og sækir síðan minningar til að mála.
Viðfangsefni og stíll Tolla hafa breyst nokkuð ört og þróast. Eldri verkin voru mörg kraftmikil verk af dýrum og torkennilegum verum, dökkar myndir af sjávarsíðunni eða næstum logandi líkamar í undarlegri iðu. Um hríð heillaðist Tolli af torræðum hlíðum, líflausum skriðum og steinum innan um kalda fjalltinda en undanfarið hefur hann málað myndir af speglun í tjörnum, eldgosum og eyðibýlum og er að byrja að taka fyrir þokuna. Helsti munurinn á gömlu og nýju landslagsmyndum Tolla liggur í afstöðu hans til birtunnar. Áður mætti birtan afgangi; hún var tæki til að hnykkja á þrívídd og efnisþáttum landslagsins. Í dag er birtan hryggjarstykki verkanna. Fjöllin leysast upp eða renna saman með dularfullum hætti, það kviknar í jöklunum og hafið molnar niður í marglit mynstur.

Tolli, sem er mikill velgjörðarmaður Fylkis, hefur lagt félaginu til málverk fyrir Herrakvöld Fylkis í fjölda ára og það er okkur mikil ánægja að tilkynna að sami háttur verður á nk. föstudag.

---

Áslaug Íris Katrín Friðjónsdóttir (f. 1981) lauk MFA-gráðu frá School of Visual Arts í New York árið 2009 og BA-gráðu í myndlist frá Listaháskóla Íslands árið 2006. Verk hennar einkennast af ríkri efnishyggju þar sem hún kannar abstrakt myndmál með fjölbreyttum efnum og aðferðum.
Áslaug hefur haldið fjölda einkasýninga og tekið þátt í samsýningum á söfnum og galleríum víðs vegar um Evrópu, Bandaríkin og á Íslandi. Af samsýningum má nefna Looking Inward, Looking Outward: 140 Years of the National Gallery of Iceland í Listasafni Íslands, Stellingar | Linear Narratives í Berg Contemporary og Skúlptúr Skúlptúr í Gerðarsafni. Meðal einkasýninga hennar eru Open í Þulu, Bergmál í Listval Gallery, Heritage í Þulu og Skil | Skjól í Neskirkju.

Hún tók þátt í CHART listamessunni í Kaupmannahöfn árið 2024, Market listamessunni í Stokkhólmi árið 2023, auk samsýninga í sendiráðum Íslands í Kaupmannahöfn og Stokkhólmi. Verk Áslaugar eru í eigu bæði einkaaðila og opinberra safna.
Það er Knattspyrnudeild Fylkis mikið ánægjuefni að kynna verk Áslaugar Írisar til leiks í fyrsta sinn á Herrakvöldi í samstarfi við listamanninn sjálfan og Þulu Listgallerí.
Um verkið sem boðið verður upp á Herrakvöldi Fylkis nk föstudag: Kjarni var hluti af sýningunni Spegilmynd sem fjallar um umbreytingu, þroska og nýja mynd sjálfsins. Kjarni vísar beint í okkar eigin kjarna og formin í verkinu minna á fiðrildi að brjótast út úr lirfuformi sínu og takast á flug, eða bók sem opnuð er á nýjan kafla lífsins. Litagleði einkennir oftar en ekki nýleg verk Áslaugar sem sér liti í tónlist og það má segja að verkið Kjarni sé einstaklega hljómfagurt verk þar sem vatnslitir, kol og pastell stíga taktinn í innsta kjarnanum.

---

Þorgrímur Andri Einarsson (f. 1980) er listamaður sem lærði hljóðhönnun í School of Audio Engineering í London og útskrifaðist frá Konunglega tónlistarháskólanum í Den Haag í Hollandi með BA gráðu í tónlist. Síðan þá hefur hann í auknum mæli einbeitt sér að myndlist.

Þorgrímur Andri er kunnur fyrir einstakt listrænt sjónarhorn og fjölbreytt myndefni, þar sem hann dregur oft innblástur úr íslenskri náttúru, menningu og sagnfræði. Verk Þorgríms bera oft vitni um djúpar tilfinningar og umhugsun um tengsl mannsins við umhverfi sitt. Hann hefur sýnt verk sín víða, bæði innanlands og á alþjóðavettvangi, og hefur hlotið fjölmargar viðurkenningar fyrir framlag sitt til listaheimsins.

Þorgrímur Andri hefur lagt Fylki lið undanfarin ár á Herrakvöldinu og notið mikilla vinsælda. Það er ánægjulegt að kynna að sami háttur verður á nk. föstudag þegar verk hans „Vestfirðir“ verður boðið upp. Þorgrímur Andri Einarsson (f. 1980) er listamaður sem lærði hljóðhönnun í School of Audio Engineering í London og útskrifaðist frá Konunglega tónlistarháskólanum í Den Haag í Hollandi með BA gráðu í tónlist. Síðan þá hefur hann í auknum mæli einbeitt sér að myndlist.

Þorgrímur Andri er kunnur fyrir einstakt listrænt sjónarhorn og fjölbreytt myndefni, þar sem hann dregur oft innblástur úr íslenskri náttúru, menningu og sagnfræði. Verk Þorgríms bera oft vitni um djúpar tilfinningar og umhugsun um tengsl mannsins við umhverfi sitt. Hann hefur sýnt verk sín víða, bæði innanlands og á alþjóðavettvangi, og hefur hlotið fjölmargar viðurkenningar fyrir framlag sitt til listaheimsins.

Þorgrímur Andri hefur lagt Fylki lið undanfarin ár á Herrakvöldinu og notið mikilla vinsælda. Það er ánægjulegt að kynna að sami háttur verður á nk. föstudag þegar verk hans „Vestfirðir“ verður boðið upp.

Knattspyrnudeild Fylkis er ánægð að tilkynna að samkomulag hefur náðst við Júlíu Huld Birkisdóttir um framlengingu á samningi hennar, og mun nýgildandi samningur gilda út keppnistímabilið 2026.

Júlía Huld, fædd árið 2009 er uppalinn Fylkisleikmaður sem hefur spilað upp alla yngri flokka félagsins og verið lykilleikmaður þar síðustu ár. Júlía Huld hefur verið hluti af meistaraflokkshópi félagins síðustu 2 tímabil.

Við hjá Fylki erum afar stolt þegar uppaldir leikmenn halda tryggð við félagið, sýna metnað og eru tilbúnir að leggja sitt af mörkum til að styðja liðið og ná sameiginlegum markmiðum á komandi keppnistímabili.

Við bindum miklar vonir við Júlíu Huld á komandi keppnistímabili og hlökkum til að sjá hana áfram spila í appelsínugulu.