Árni Freyr ráðinn þjálfari meistaraflokks karla, ásamt Birni Viðari Ásbjörnssyni formanni meistaraflokksráðs og Ragnari Páli Bjarnasyni formanni knattspyrnudeildar

Knattspyrnudeild Fylkis hefur ráðið Árna Frey Guðnason sem þjálfara karlaliðs Fylkis til næstu þriggja ára. Árni Freyr, sem mun hefja störf í næsta mánuði, er Fylkisfólki vel kunnur eftir að hafa leikið með Fylkisliðinu við góðan orðstír keppnistímabilin 2012 og 2013. Alls lék Árni Freyr tæpa 100 leiki í tveimur efstu deildum knattspyrnunnar á Íslandi á sínum tíma og í þeim leikjum skoraði hann alls 38 mörk.

Árni sem er 38 ára gamall hefur undanfarin ár verið þjálfari meistaraflokks karla hjá ÍR og náð þar mjög eftirtektarverðum árangri. Haustið 2023 ávann ÍR sér keppnisrétt í Lengjudeildinni. ÍR liðið endaði í fimmta sæti Lengjudeildarinnar núna í sumar og ávann sér rétt til þátttöku í úrslitakeppni um laust sæti í Bestu deildinni þar sem liðið féll úr leik fyrir liði Keflavíkur. Áður en Árni tók að sér þjálfun hjá ÍR hafði hann um árabil verið yfirþjálfari yngri flokka hjá uppeldisfélagi sínu, FH. 

Björn Viðar Ásbjörnssson, formaður meistarflokksráðs karla hjá Fylki: Við bindum miklar væntingar til starfa Árna Freys fyrir Fylki. Það er engin launung að niðurstaða þess tímabils sem senn er lokið er okkur Fylkisfólki mikil vonbrigði en á sama tíma erum við staðráðin í að snúa bökum saman og byggja upp öflugt Fylkislið á þeim góða grunni sem er til staðar í Árbænum. Við munum draga lærdóm af því sem liðið er og horfum spennt til framtíðar. 

Árni Freyr Guðnason, nýráðinn þjálfari Fylkis: Það er mikill heiður fyrir mig að snúa aftur til Fylkis og að fá nú tækifæri til að þjálfa Fylkisliðið. Mitt mat er að það sé mjög mikið spunnið í liðið og með vinnusemi og metnað að leiðarljósi er ég sannfærður um að við munum skila góðri frammistöðu í framtíðinni. Hér í Árbænum eru aðstæður til fyrirmyndar og ég hlakka til að hefja störf fyrir Fylki. 

 Knattspyrnudeild Fylkis þakkar Knattspyrnudeild ÍR fyrir fagmannleg samskipti í tengslum við þessa ráðningu.

Árni Freyr ráðinn þjálfari meistaraflokks karla, ásamt Birni Viðari Ásbjörnssyni formanni meistaraflokksráðs og Ragnari Páli Bjarnasyni formanni knattspyrnudeildar

Á myndinni, frá vinstri, eru Björn Viðar Ásbjörnsson formaður meistaraflokksráðs karla, Árni Freyr Guðnason og Ragnar Páll Bjarnason, formaður knattspyrnudeildar.

Fylkir hefur gert samning við Bjarna Þórð Halldórsson um að taka við starfi aðalþjálfara kvennaliðs Fylkis.

Bjarni Þórður er Fylkisfólki vel kunnur en hann á að baki fjölda leikja með félaginu ásamt því að hafa komið að þjálfun allra flokka til margra ára, nú síðast sem markmannsþjálfari meistaraflokks kvenna hjá félaginu. Bjarni Þórður er auk þess Árbæingur og Fylkis maður alveg í gegn.

Við hjá félaginu höfum miklar væntingar til samstarfsins við Bjarna Þórð og hlökkum til að vinna með honum að áframhaldandi framgangi kvennaknattspyrnunnar hjá Fylki.

Um leið þakkar Fylkir Gunnari Magnúsi Jónssyni fyrir gott starf hjá Fylki í þau tvö ár sem hann var hjá okkur sem þjálfari meistaraflokks kvenna. Við þökkum honum fyrir hans framlag til Fylkis og óskum honum alls hins besta í hans næstu verkefnum.

#viðerumÁrbær

Miðvikudaginn 30.október 2024 kl. 19:30 er boðað til aðalfundar knattspyrnudeildar Fylkis í samkomusal Fylkishallar.

Dagskrá:

Hefðbundin aðalfundarstörf samkvæmt reglugerð knattspyrnudeildar og lögum félagsins.

Önnur mál

 

Stjórn knattspyrnudeildar Fylkis

Guðmar Gauti Sævarsson hefur verið valinn í lokahóp U-17 ára landsliðs karla sem tekur þátt í undankeppni EM 2025.
 
Undankeppnin fer fram hér á Íslandi dagana 25.10 – 5.11.
 
Guðmar er afar efnilegur leikmaður sem hefur átt fast sæti í landsliðinu undanfarin ár. Einnig er hann algjör lykilmaður í 2.flokki félagsins ásamt því að æfa og spila með meistaraflokki þrátt fyrir ungan aldur.
 
Við óskum Guðmari innilega til hamingju með valið!


 
#viðerumÁrbær
Rúnar Páll Sigmundsson þjálfari meistaraflokks karla hjá Fylki mun láta af störfum hjá félaginu þegar samningur hans rennur út í lok þessa mánaðar.
 
Ragnar Páll Bjarnason, formaður Knattspyrnudeildar Fylkis:
,,Rúnar Páll er búinn að vinna afar gott starf hjá Fylki þau rúmu þrjú ár sem hann hefur verið við stjórnvölinn hjá okkur. Við kveðjum Rúnar Pál Sigmundsson með þökkum fyrir allt hans framlag til Fylkis um leið og við óskum honum alls hins besta í næstu verkefnum sem hann mun taka að sér.”
 
Rúnar Páll Sigmundsson:
,,Mér hefur liðið virkilega vel hjá Fylki allan minn tíma hjá félaginu. Ég vil þakka starfsfólki, leikmönnum, stjórn, meistaraflokksráði sem og stuðningsfólki Fylkis fyrir samstarfið og stuðninginn við Fylkisliðið og mín störf á undanförnum árum. Fylkir er frábært félag með umgjörð og aðstæður sem eru til mikillar fyrirmyndar.”
 
#viðerumÁrbær
📸Hafliði Breiðfjörð
Næst er það Krókurinn – rútuferð í boði.
 
Það var frábær stemmning í stúkunni á Samsung vellinum í frábærum sigri okkar stúlkna og þökkum við öllum þeim sem mættu og studdu stelpurnar til sigurs.
 
Næsti úrslitaleikur hjá stelpunum er laugardaginn 7. September kl: 14:00 þegar þær mæta Tindastól á Sauðárkróki. Með sigri kemst liðið upp úr fallsæti þegar einn leikur er eftir.
 
Boðið verður upp á rútuferð norður og til baka og kostar sætið aðeins 2500 kr. Lagt verður af stað klukkan 09:00 frá Fylkisheimilinu. Áætluð heimkoma er milli 19:00 og 20:00.
 
Skráning í ferðina er hér að neðan eða með tölvupósti á juliusorn@outlook.com.
 
Theodór Ingi og Stefán Gísli valdir í lokahóp U-19! 🇮🇸
Þórhallur Siggeirsson, þjálfari U19 karla, hefur valið þá Theodór Inga og Stefán Gísla í lokahóp U-19 ára landsliðs karla sem spilar á æfingamót í Slóveníu 3.-11.september næstkomandi.
Báðir eru þeir lykilleikmenn í 2.flokki ásamt því að vera með mikilvæg hlutverk í meistaraflokki félagsins.
Við fögnum því að okkar frábæra uppeldisstarf sé að skila okkar efnilegu leikmönnum í landsliðsverkefni og hlökkum til að fylgjast með þeim í framtíðinni!
Til hamingju Teddi og Stebbi

Knattspyrnudeild Fylkis – ábyrgur rekstur

Vegna umfjöllunar DV í dag um að leikmenn Fylkis hafi verið beðnir um að bíða með að fá laun sín greidd þá vill stjórn Knattspyrnudeildar Fylkis taka eftirfarandi fram.

Knattspyrnudeild Fylkis kappkostar og leggur áherslu á að rekstur deildarinnar fari fram með ábyrgum hætti.

Það sem er rétt í því sem fram kemur í DV er að í gegnum opið og heiðarlegt samtal hefur verið samið við nokkra leikmenn Fylkis um að deildin greiði þeim seinna en upphaflega var áformað.

Slíkar aðstæður hafa komið upp áður í rekstri Knattspyrnudeildar Fylkis og þá, líkt og nú, hefur verið samið um þessar greiðslur við þá sem eiga hlut að máli.

Knattspyrnudeild Fylkis leggur áherslu á fyrirsjáanleika gagnvart þessum aðilum og að gert verði upp samkvæmt samkomulagi eins og áður hefur verið gert.

Í þessu samhengi er rifjað upp að tekjur deildarinnar voru um 280 milljónir króna á árinu 2023 og deildin var rekin með hagnaði.

Stjórn Knattspynudeildar Fylkis, 6. ágúst 2024

Brynjar Björn Gunnarsson hefur verið ráðinn sem aðstoðarþjálfari meistaraflokks karla og gildir samningur hans út tímabilið hið minnsta.
 
Brynjar þarf vart að kynna fyrir fótboltaaðdáendum en hann á að baki farsælan feril bæði sem leikmaður og þjálfari. Hann leikið fjölda leikja í efstu deildum Englands m.a með Watford og Reading ásamt því að vera lykilmaður í Íslenska landsliðinu til margra ára en hann lék 74 landsleiki með Íslandi.
 
Brynjar hóf þjálfaraferil sinn hjá unglingaliði Reading en þaðan fór hann svo til Stjörnunnar þar sem hann var aðstoðarþjálfari Rúnars Páls á árunum 2014-2017 . Sem aðalþjálfari hefur hann þjálfað HK og Grindavík hér á landi ásamt Örgryte í Svíþjóð.
 
Það er frábært fyrir Fylki að fá reynslumikinn mann í þjálfarateymið og bindum við miklar vonir við að reynsla hans og þekking hjálpi liðinu í þeirri baráttu sem framundan er í Bestu deildinni.
 
Velkominn í Árbæinn Brynjar Björn!
 
#viðerumÁrbær

Árbæjarhverfið er náttúruperla í borginni, í hverfinu okkar sem teygir sig frá Ártúnsholtinu, yfir Selásinn og upp fyrir Norðlingaholtið. Í hugum okkar íbúanna hér, hvort sem við erum hér borin og barnfædd eða aðflutt síðar meir, þá er það samt, fyrir sennilega flest okkar, samfélagið sem dregur fólk hingað. Við hittumst á förnum vegi, spjöllum um veðrið , fuglalífið í dalnum og íþróttirnar okkar. Erum þá jafnan í einhverri appelsínugulri flík. Hér er einhver umlykjandi bæjarbragur. Hér er samstaða og samkennd með því sem við eigum saman.

Við erum samt ekkert of rík af samkomustöðum í hverfinu. Fylkisvöllurinn er staðurinn þar sem sennilega flestir Árbæingar koma reglulega saman, hitta gamla og nýja nágranna. Eignast nýja vini. Hér er það Fylkisvöllurinn, beint í miðju hverfinu, þar sem Árbæingar á öllum aldri hafa leikið sér, hópast saman og stundað íþróttir af krafti um áratugaskeið, með sterkri samstöðu sem einkennir Árbæinga.

Við búum svo vel að eiga nú tvö lið í efstu deild fótboltans og það færir félaginu okkar umtal, styrk, vöxt og möguleika á að gera betur sem stór félagsmiðstöð fyrir samstillta samfélagið okkar allra í 110 Reykjavík.

Það er mikilvægt að við tökum saman þátt í að halda uppi lífvænlegu og öflugu starfi, þó við höfum kannski mismunandi mikinn áhuga á fótbolta. Að hitta sitt fólk, hvetja sín lið, strákana okkar og stelpurnar í Bestu deild, sem flest eiga það sameiginlegt að vera uppalin hérna í hverfinu. Þetta er okkar fólk, sem hljóp hér um sem börn vina okkar fyrir ekki svo löngu.

Það er stefna Fylkis að byggja á ungviðinu okkar því það tryggir öflugt barna- og unglingastarf og það höfum við sannarlega gert og gerum betur en flest önnur félög í því. Og þetta ætlum við að gera áfram.

Knattspyrnudeild Fylkis hvetur því alla Árbæinga til að halda áfram að koma saman, halda áfram að hittast á vellinum á næsta leik, halda áfram að mæta í appelsínugulu og hvetja okkar fólk áfram. Ekki gefast upp þó á móti blási, því þetta er þess virði að berjast fyrir. Það erum við, þið, samfélagið í Árbænum, sem erum Árbæjarins besta.

Áfram appelsínugult, áfram Fylkir. Við erum Árbær.

Gleði – Virðing – Metnaður

Stjórn Knattspyrnudeildar Fylkis