Íslensk knattspyrna 2024

Bókin Íslensk knattspyrna 2024 er komin út. Þetta er 44. árið sem bókin er gefin út en hún hefur komið út samfleytt frá árinu 1981. Sögur Útgáfa gefa út bókina sem er stærri en nokkru sinni fyrr, 304 blaðsíður í stóru broti og skreytt með um 450 myndum af leikmönnum og liðum.

Í bókinni er sagt ítarlega frá Íslandsmótunum 2024 í öllum deildum karla og kvenna, sem og yngri flokkunum, bikarkeppninni, Evrópuleikjunum og vetrarmótunum. Þá er landsleikjum ársins í öllum aldursflokkum gerð góð skil og fjallað sérstaklega um íslenska knattspyrnufólkið sem leikur erlendis.

Í bókinni er ítarleg tölfræði um leikmenn og lið, sjá má liðsskipan allra liða í öllum deildum í meistaraflokkum karla og kvenna, leikjafjölda leikmanna í efri deildum, leikjahæstu karla og konur, marka- og leikjahæstu karla og konur í deildakeppni hér og erlendis ásamt mörgu fleiru.

Viðtöl í bókinni eru við Ástu Eir Árnadóttur og Andra Rafn Yeoman, Íslandsmeistara kvenna og karla með Breiðabliki, en einnig við Hallgrím Mar Steingrímsson, leikmann bikarmeistara KA og Sævar Pétursson framkvæmdastjóra KA.

Í ár er bókin gefin út með tveimur kápum. Á kápu hefðbundnu útgáfunnar eru myndir af Íslands- og bikarmeisturum Breiðabliks í karla- og kvennaflokki og sú útgáfa er í almennri sölu og dreifingu og fæst í bókaverslunum Eymundsson um allt land. Einnig er hægt að panta hana, ásamt eldri bókum, á heimasíðu Sögur Útgáfa, sogurutgafa.is, eða í síma 557 3100.

Í sérútgáfu er mynd af bikarmeisturum KA í karlaflokki á kápunni og sú bók er eingöngu til sölu hjá KA en upplýsingar eru á heimasíðu félagsins, www.ka.is.